काठमाडौं – सुरक्षा र द्विपक्षीय सम्बन्ध विस्तार गर्ने उद्देश्यले नेपाल–भारत संयुक्त सैन्य अभ्यासको १८औँ संस्करण रुपन्देहीको सालझण्डीमा मङ्गलबारदेखि सुरु हुँदैछ ।

‘सूर्यकिरण’ नामक बटालियन स्तरीय संयुक्त सैन्य अभ्यास जंगल युद्ध, कठिन भूगोलमा आतंकवाद विरोधी, संयुक्त राष्ट्र संघको बडापत्र अनुसार शान्ति स्थापना , विपद् व्यवस्थापन र राहत परिचालनमा मानवीय सहायता, आन्तरिक क्षमता निर्माण र वातावरण संरक्षणमा केन्द्रित रहनेछ ।

दुई सातासम्म चल्ने उक्त अभ्यासमा नेपाली सेनाको श्रीजंग गण र भारतीय सेनाको ११औँ गोर्खा राइफलको सहभागिता रहने छ ।नेपाली सेनाका प्रवक्ता गौरवकुमार केसीले संयुक्त सैन्य तालिमले मैत्रीपूर्ण सम्बन्ध प्रगाढ हुने अपेक्षा गरिएको जानकारी दिए । संयुक्त सैन्य अभ्यासले नेपाल र भारतबीचको विश्वास र सांस्कृतिक सम्बन्धलाई पनि विस्तार गर्ने र यसले व्यावसायिक सहकार्य पनि बढाउने उनले बताए ।

संयुक्त अभ्यासको १७ औं संस्करण गत वर्ष भारतको पिथौरागढमा भएको थियो ।
हालसम्म यो संयुक्त अभ्यासमा सहभागी नेपाली सेनाको संख्या ४ हजार २ सय १५ पुगेको छ भने भारतीय पक्षबाट ४ हजार ४ सय ४२ पुगेको छ ।
यो संयुक्त अभ्यास विसं २०६७ मा सुरु भएको थियो ।