काठमाडौं : अख्तियार दुरुपयोग अनुसन्धान आयोगले राष्ट्रिय किताबखाना तहाचलका शाखा अधिकृतलाई पक्राउ गरेको छ। आयोगको टोलीले ४५ वर्षीय अधिकृत धनेश्वर प्रसाईलाई तीन लाख रुपैयाँ घुससहित पक्राउ गरेको हो।

आइतबार प्रसाईको कार्यकक्षमै पुगेर आयोगको टोलीले सेवाग्राहीबाट लिइसकेको रकमसहित उनलाई नियन्त्रणमा लिएको प्रवक्ता नरहरि घिमिरेले बताए।

प्रवक्ता घिमिरेले उनीविरुद्ध थप अनुसन्धान भइरहेको जानकारी दिए। घिमिरेका अनुसार पेन्सनपट्टा बनाइदिने प्रयोजनार्थ सेवाग्राहीसँग घुस/रिसवत माग गरिरहेको सूचना तथा निवेदनका आधारमा टोली प्रसाईको कार्यकक्षमा पुगेको थियो।