काठमाडौं – पृथ्वीनारायण शाहको शीतकालीन दरबारको रुपमा परिचित नुवाकोटको शेरा दरबारको १६३ रोपनी १३ आना जग्गा निजी कम्पनीबाट जफत गरेर सरकारको नाममा ल्याउन केन्द्रीय अनुसन्धान ब्यूरो (सीआईबी) ले सिफारिस गरेको छ ।

कुनै बेला माओवादी अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’का स्वकीय सचिव रहेका नेकपा माओवादी केन्द्रका नेता विकेश श्रेष्ठ सञ्चालक रहेको अन्नपूर्ण फार्मिङ कम्पनीको नाममा रहेको जग्गा सरकारको नाममा ल्याउनुपर्ने निष्कर्षसहित भूमि, व्यवस्था, सहकारी तथा गरिबी निवारण मन्त्रालयलाई प्रतिवेदन बुझाएको छ भने यसमा संलग्नमाथि कारबाहीका लागि अख्तियार दुरुपयोग अनुसन्धान आयोगलाई समेत लेखी पठाएको छ ।।

पृथ्वीनारायण शाहको पालाको १८४ रोपनी जग्गा पुस्तैनी सम्पत्तिका रुपमा हस्तान्तरण हुँदै तत्कालीन राजा त्रिभुवनकी छोरी हेलेन शाह र नातिनी जयन्ती शाहको नाममा आएको थियो ।तर, भूमि सुधार ऐन (२०२१), मालपोत ऐन (२०३४) लागू भएर कार्यान्वयनमा आउँदा हदबन्दी अनुसार हेलेनको नाममा १२ रोपनी र जयन्तीको नाममा ६ रोपनी ९ आना जग्गा कायम भएको थियो ।त्यसबेला हदबन्दीभन्दा बढी रहेको जग्गा कृषि लगायतको प्रयोजनका लागि दिने व्यवस्था थियो । त्यसअनुसार, बाँकी रहेको १६४ रोपनी १३ आना जग्गा नापी र मालपोत कार्यालयको निर्णयका आधारमा गौरीशंकर फर्मिङ कम्पनीलाई दिइएको अनुसन्धानबाट खुलेको छ ।

यो प्रक्रियाबाट २०४४ सालदेखि विकेश श्रेष्ठले जग्गाको भोगचलन गर्न थालेको भेटिएको छ । पछि ढड्डामा गौरीशंकर फार्मिङको नाम काटेर अन्नपूर्ण फार्मिङको नाम बनाएको फेला परेको छ ।अनुसन्धान अधिकृतहरुका अनुसार, २०६६ र २०६७ सालमा कम्पनीमा शेयरधनी थप्दै ७ जना बनाइएको थियो । २०७२ सालमा भने फेरि सञ्चालक हेरफेर गरेर विकेश श्रेष्ठ, अजयकुमार सूर्यवंशी र ध्रुवलाल श्रेष्ठ नेतृत्वमा गएको देखिन्छ ।‘पछिल्लो समय ध्रुवलाललाई समेत हटाएर छोरा मनोबल श्रेष्ठलाई कम्पनीमा ल्याएको देखिन्छ’, एक अधिकृत भन्छन्, ‘यसरी कम्पनीलाई एउटा परिवारभित्र मात्र सीमित गरेको देखिँदैन ।’

पछिल्लो समय यसरी कब्जामा लिइएको नुवाकोटको विदुर नगरपालिका–२, साबिकको भैरवी गाविस–७ को जग्गामा प्लटिङ गर्न थालिएको थियो । जग्गा बिक्री गर्ने भनेर विभिन्न व्यक्तिसँग रकम उठाएको सूचना समेत प्रहरीले संकलन गरेको छ ।
नेत्रविक्रम चन्द नेतृत्वको माओवादी भूमिगत भएका बेला २०७५ सालमा स्थानीयले नेकपाका नेताहरुसँग समेत यसबारे गुनासो गरेका थिए । त्यसपछि तत्कालीन विप्लव समूहले स्थानीयको असन्तुष्टिलाई सम्बोधन गरेर प्रभाव विस्तार गर्न दरबारको जग्गामा आफूहरुको झण्डा समेत गाडेको जाँचका क्रममा खुलेको छ ।