काठमाडौं – नेपाल टेलिकम, कृषि विकास बैंक लिमिटेड (एडिबिएल) र नागरिक लगानी कोष (सीआईटी) लगायत तीनवटा सार्वजनिक संस्थाले आफ्ना शेयरधनीलाई ३० प्रतिशतसम्म लाभांश दिने घोषणा गरेका छन् ।

नेपाल टेलिकमले आफ्ना शेयरधनीलाई ३० प्रतिशत लाभांश दिने प्रस्ताव गरेको छ, जुन विगत डेढ दशकयताकै न्यून हो । यसअघि सरकारी स्वामित्वको दूरसञ्चार कम्पनीले औसत ४० प्रतिशतभन्दा बढी लाभांश दिँदै आएको थियो ।

नेपाल टेलिकमको चुक्ता पुँजी १८ अर्ब रुपैयाँ छ । आर्थिक वर्ष २०२३/२४ को नाफाबाट कुल ५ अर्ब ४० करोड रुपैयाँ नगद लाभांश वितरण गर्ने प्रस्ताव गरेको छ । समीक्षा वर्षमा नेपाल टेलिकमको राजस्व ६ वर्षअघि ४५ अर्ब ५७ करोडबाट घटेर ३८ अर्ब ९ करोड पुगेको छ । त्यसैगरी, गत आर्थिक वर्षमा यसको खुद नाफा ६ अर्ब रुपैयाँमा सीमित थियो, जुन आर्थिक वर्ष २०७५/७६ मा १५ अर्ब ६७ करोड रुपैयाँ थियो ।

यसैबीच, सीआईटीले आफ्ना शेयरधनीहरूलाई १३ प्रतिशत लाभांश दिने तयारी गरेको छ । जसमा ७ प्रतिशत बोनस सेयर र ६ प्रतिशत नगद लाभांश समावेश छ । आइतबार बसेको अर्धसरकारी निकायको वार्षिक साधारणसभाले लाभांशको प्रस्ताव पारित गरेको सीआईटीले जारी गरेको विज्ञप्तिमा उल्लेख छ ।

त्यस्तै, एडिबिएलले १० दशमलव ५३ प्रतिशत लाभांश शेयरधनीलाई वितरण गर्ने प्रस्ताव गरेको छ । एडिबिएलको भर्खरै बसेको सञ्चालक समितिको बैठकले तीन प्रतिशत बोनस सेयर र ७ दशमलव ५३ प्रतिशत नगद लाभांश दिने प्रस्ताव गरेको हो ।

यस सम्बन्धमा नेपाल राष्ट्र बैंकबाट अन्तिम स्वीकृतिको प्रतीक्षामा रहेको एडीबीएलले जनाएको छ । गत वर्ष सरकारी स्वामित्वमा रहेको वित्तीय संस्थाले आफ्ना शेयरधनीलाई कुनै प्रतिफल दिएको छैन ।