काठमाडौं – कांग्रेसको आगामी महाधिवेशनको टुंगो नलाग्दै पार्टीभित्र नेतृत्वका लागि ध्रुवीकरण बढाउने प्रयास भइरहेको छ ।

पार्टी सभापति शेरबहादुर देउवाले दुई कार्यकालभन्दा बढी नेता रहन नपाउने संवैधानिक व्यवस्थाका कारण आगामी महाधिवेशनबाट कार्यकारिणीबाट अवकाश लिँदैछन् । उनको अवकाशसँगै कांग्रेसभित्रको परम्परागत गुट टुटेर नयाँ ध्रुवीकरण सुरु हुने सम्भावना छ ।

सभापति देउवाले आफ्नो उत्तराधिकारीको तयारी भने गरेका छैनन् । पार्टी नेतृत्वका उम्मेदवारहरु उनको समर्थन र अनुमोदन पाउन प्रयासरत छन् । कांग्रेस उपसभापति पूर्णबहादुर खड्का, कृष्णप्रसाद सिटौला, विमलेन्द्र निधि, प्रकाशमान सिंह र शशांक कोइराला देउवाको समर्थनका लागि दौडमा छन् । तर, देउवाले संगठनमा आफ्नो पकड राख्ने पार्टीका अन्य नेता शेखर कोइराला र महासचिव गगन थापातर्फ झुकेको चर्चा कांग्रेसको वृत्तमा छ ।

यता बालकृष्ण खाँण, एनपी साउद, प्रकाशशरण महत, मोहनबहादुर बस्नेतलगायतका नेताहरूले शेखर कोइरालाप्रति सकारात्मक सद्भावना देखाउन थालेका छन् । अर्कोतर्फ देउवाले राष्ट्रिय राजनीति र छलफलमा निर्णायक भूमिकाका लागि महासचिव थापालाई अगाडि बढाइरहेका छन् ।

कोइराला र थापामा उनको छनोट को हो भन्ने स्पष्ट छैन । तर यी दुई नेताबीचको विवादले पार्टीभित्र नयाँ ध्रुवीकरणको वकालत पनि गर्न थालेको छ ।

पार्टी नेता हृदयराम थानीले १५औँ महाधिवेशनबाट देउवाले अवकाश लिएपछि पार्टीमा नयाँ ध्रुवीकरण हुने दाबी गरेका छन् । ‘हिजोको समूह विखण्डन हुन सक्छ। नयाँ प्रकारका गुटहरू बन्नेछन्। पुरानो समूहको कोलाहल अब रहनेछैन। त्यसको दाग देखिन थालेको छ,’ थानीले भने, ‘संस्थापनका तर्फबाट देउवाको उत्तराधिकारी को हुने निश्चित छैन । राजनीतिमा जे पनि हुन सक्छ । त्यसैले शेखर कोइरालालाई बुद्धिमानीपूर्वक अघि बढ्नुपर्छ भन्ने हाम्रो सुझाव छ।’

कोइरालाले १५औँ महाधिवेशनमा आफू सभापतिको उम्मेदवार हुने घोषणा यसअघि नै गरिसकेका छन् । महासचिव थापाले सार्वजनिक रुपमा घोषणा नगरे पनि नेतृत्वमा आफ्नो दाबी स्वभाविक हुने बताउँदै आएका छन् ।

महाधिवेशन नजिकिंदै गर्दा कोइराला र थापाबीचको सम्बन्ध बिग्रँदै गएपछि देउवा भने पार्टीभित्रै सहज भएको देखिन्छन् । यी दुई नेताबीचको आन्तरिक कलहले पार्टीमा नयाँ ध्रुवीकरण हुने सम्भावनालाई बढाउँदै लगेको देखिन्छ ।