अमेरिकी राष्ट्रपतिमा निर्वाचित डोनाल्ड ट्रम्पले आफुले पद सम्हालेकै दिन जन्मसिद्ध नागरिकताको नियम खारेज गर्ने बताएका छन् ।

अमेरिकी भूमिमा जन्मका आधारमा अमेरिकी नागरिकता दिने नियम अब रहने छैन। ट्रम्पको यो निर्णयसँगै अमेरिकामा रहेका आप्रवासीहरुमा चिन्ता बढेको छ ।

ट्रम्पले जनवरी २०, २०२५ मा राष्ट्रपति पदको सपथ लिनेछन्। अमेरिकामा कानुनी र अवैध आप्रवासीको संख्या लामो समयदेखि बहसको विषय बनेको छ। ट्रम्पले आफ्नो चुनावी अभियानमा यो मुद्दा उठाएका थिए ।

विश्वमा नागरिकता पाउनका लागि विभिन्न नियमहरु छन् । अमेरिकी भूमिमा जन्मेका व्यक्तिलाई स्वत: अमेरिकी नागरिक मान्ने कानुन छ। गृहयुद्ध पछि, यूएस कांग्रेसले सन् १८६८ मा यो नियम लागू गरेको थियो । त्यो समयमा यो नियम अमेरिकामा आएका अश्वेतहरू लगायत सबैलाई नागरिकता प्रदान गर्न ल्याइएको थियो ।

त्यसबेला अमेरिकामा जन्मिएका बालबालिकालाई स्वतः नागरिकता दिने प्रावधान लागू भएको थियो । नियमले त्यस्ता बालबालिकाका अभिभावकहरू अमेरिकामा कानुनी वा गैरकानूनी छन् कि छैनन् भन्ने फरक पर्दैनथियो ।

यो नियम मूलतः संयुक्त राज्य अमेरिकामा दासको रूपमा ल्याइएका मानिसहरूलाई सजिलो बनाउनको लागि पेश गरिएको थियो।

डोनाल्ड ट्रम्प र उनका समर्थकहरूले उक्त कानुनको दुरुपयोग भइरहेको भन्दै अमेरिकी नागरिक बन्नका लागि नयाँ र कडा कानुनको माग गर्दै आएका छन् ।