महेन्द्रनगर : सुदूरपश्चिम विश्वविद्यालय सेवा आयोगको कार्यालयमा प्रध्यापकहरूले ताला लगाइदिएका छन्।

सुदूरपश्चिम विश्वविद्यालय सेवा आयोगले कार्यरत शिक्षण सहायक पदका शिक्षकलाई विशेष आन्तरिक प्रतियोगिताद्वारा स्थायी गर्नका लागि विज्ञापन आह्वान गरेको तर आन्तरिक प्रतियोगितामा केन्द्रीय क्याम्पसलाई छुटाएको भन्दै विश्वविद्यालयका छवटा प्राध्यापक संघहरूले सेवा आयोगमा अनिश्चितकालिन तालाबन्दी गरेका हुन् ।

केन्द्रीय क्याम्पसमा विश्वविद्यालयमा स्थापनाकालदेखिनै कार्यरत शिक्षकलाई सेवा आयोगले छुटाएको र विश्वविद्यालय सभाबाट पारित भइ कार्यकारी परिषद्ले निर्णय गरेर सेवा आयोगलाई सिफारिस गर्दा पनि एकै प्रकृतिका निर्णयमा समेत विभेद गरिएको भन्दै ताला लगाएको सुदूरपश्चिम विश्वविद्यालय प्राध्यापक संघ केन्द्रीय क्याम्पसका सभापति किशोर बोहराले बताएका छन्।

यसअघि पनि विश्वविद्यालय सेवा आयोगको कार्यालयमा आंगिक क्याम्पसमा प्राध्यापकदेखि कर्मचारीको समायोजनाको माग गर्दै ताला लगाइएको थियो ।
अदालतसम्म पुगेको उक्त समायोजनको मुद्दामा अदालतको फैसलाले विज्ञापन खोल्ने बाटो खुलेपछि सेवा आयोगले आन्तरिक विज्ञापन खोले पनि केन्द्रीय क्याम्पस छुटाएको भन्दै प्राध्यापक संघहरूले विरोध जनाएका हुन् ।तस्विर: अन्नपूर्ण