कैलाली – सुदूरपश्चिम प्रदेशमा सरकार संसदमा उपस्थित नभएको (साङ्केतिक रुपमा सरकार हराएको ) भन्दै प्रतिपक्ष दलहरूले मोबाइलको टर्च बालेर सरकारको खोजी गरेका छन् ।

संसद छल्ने सरकारको विरोधमा धनगढीस्थित प्रदेश सभा भवनको मूल प्रवेश द्वारमा नेकपा एमाले, नेपाली कांग्रेस र नागरिक उन्मुक्तिका सांसदले टर्च बालेर सरकारको खोजी गरेका हुन्।

‘विपद्को बेला राहत उद्धारमा सरकार देखिएन। जनताको मुद्दा उठान गर्ने थलो संसदमा पनि सरकार भेटिएन,’ त्यसैले दिउँसै टर्च बालेर सरकार खोज्नु पर्ने अवस्था आएको नेकपा एमाले संसदीय दलका नेता राजेन्द्र सिंह रावलले बताएका छन्।

आज २ बजेको लागि आह्वान गरिएको प्रदेश सभा बैठकमा सरकारको तर्फबाट कुनै पनि मन्त्री उपस्थित नभएपछि आज बैठक नै नबसी स्थगित भएको छ ।

२० असारमा एमालेले समर्थन फिर्ता लिएपछि सुदूरपश्चिम सरकार अल्पमतमा परेको तर,मुख्यमन्त्री सोडारीले अहिलेसम्म पनि विश्वासको मत लिने मिति निर्धारण नगरेको भन्दै मुख्यमन्त्री दीर्घ सोडारीलाई नैतिकताको आधारमा राजीनामा दिन समेत प्रतिपक्षले माग गरेको छ।