काठमाडौँ — स्थानिय निर्वाचनमा बालेन,हर्क र हमालहरुको उदय पश्चात “नो नट अगेन” भन्ने नारा दिएर देउवा, ओली बा र नानीका बा – को विरोध गर्दै जनतामा एक खाले आशा जगाएर राजनीतिमा फड्को मार्दै आफुलाई स्थापित गराउन सफल रास्वपा- राष्ट्रिय स्वतन्त्र पार्टी र तिनका नेताहरु अन्त्यमा आएर हिजो “नो नट अगेन भनेर” जसको बिरोध गरेर राजनीतिमा उदाए आज तिनैको फेरो समातेर अगाडी बढेको देखिन्छ।

प्रतिपक्षमा छँदा होस् या सरकारमा रहँदा ,भुटानी शरणार्थी प्रकरणमा संसदमा चर्को स्वरले राजनीतिक मानव तस्करीको विरोध गर्दै आइरहेको रास्वपाले भुटानी शरणार्थी काण्डकै झल्को दिलाउने गरी , रास्वपा बाट उपसभामुख बनेकी इन्दिरा रानाको अमेरिकी दूतावासलाई लेखेको पत्र विवाद यतिबेला सतहमा देखिएको छ।

परराष्ट्र मन्त्रालयले सांसद र कर्मचारीको भिसा प्रक्रिया संसद् सचिवालयको अन्तर्राष्ट्रिय सम्पर्क तथा समन्वय महाशाखामार्फत गर्नुपर्नेमा अनधिकृत व्यक्तिहरूको नाम राखेर भिसा प्रक्रियाको लागि रास्वपा बाट उपसभामुख बनेकी इन्दिरा रानाले पदको दुरुपयोग गर्दै अमेरिकी दुतावासलाई भिसा प्रक्रियाको लागि लेखेको पत्रको विवाद यतिबेला सतहमा देखिएको छ।

घटना सतहमा आएपछि रास्वपाका नेताहरूले उक्त विषयलाई गम्भीरतापूर्वक लिनुको सट्टा सामान्य विषयलाई ठूलो बनाइएको टिप्पणी गरेका छन् ।

संयुक्त राष्ट्रसंघको संयन्त्र ‘कमिसन अन द स्टाटस अफ वुमेन’ को ६७ औं सत्र (सीएसडब्लू ६७) २०७९ को फागुन २२ देखि चैत ३ सम्म अमेरिकाको न्युयोर्कमा भएको र उक्त कार्यक्रममा भाग लिन जान लागेकी उपसभामुखले महिला अधिकारको अभियानसँग कुनै सम्बन्ध नभएका चार पुरुष र एक महिलालाई डेलिगेट्स बनाएर अमेरिका लैजान खोजेको र सो को लागि ति ५ जना बाट रकम लिएको समेत चर्चा चलेको छ। अमेरिका लैजाने भनेर को संग के कतिपैसा लिएको भन्ने नखुले पनि अमेरिका जान नपाएको र पैसा पनि डुबेको गुनासो प्राप्त भए पछि भने ‘लेनदेन मिलेको’ भन्दै रास्वपाले उक्त घटना गुपचुप राखेको आरोप लागेको छ।

उपसभामुख इन्दिरा रानाले आफूसँगै पाँच जना (उपेन्द्र गौतम, सुष्मा लामा, राजेश लामा, सुजन घर्ती मगर र धनप्रसाद गुरुङ ) सो कार्यक्रममा जान लागेको भन्दै उनले भिसाको अन्तर्वार्ता छिटो सारिदिन प्रक्रिया मिचेर अमेरिकी दूतावासलाई उपभामुखको लेटरप्याडमा पत्र लेखेकी थिइन् ।

पैसा दिएको तर अमेरिका जान नपाएको भन्दै सम्बन्धित व्यक्तिहरूले गत वैशाखमा रास्वपाको सम्बंदित निकायमा गुनासो गरेपछि,पार्टी सभापति रवि लामिछाने, उपसभापति डोलप्रसाद अर्याल, तत्कालीन महामन्त्री मुकुल ढकाल र संगठन विभागका सचिव शंकर श्रेष्ठबीच विभिन्न चरणमा सो विषय बारे छलफल भएको बुझिएको छ ।अमेरिका जान नपाएको र पैसा पनि डुबेको भन्दै पार्टीमा गुनासो आएको तर पछि कुरा मिल्यो र पैसा फिर्ता भयो होला भन्ने सोचेर सो विषयमा चासो नराखेको कुरा रास्वपाका संगठन सचिव शंकर श्रेष्ठले विभिन्न सञ्चार माध्यमसंग गरेको कुराकानीमा बताएका छन्।

रास्वपाका प्रमुख सचेतक सन्तोष परियारले पनि एउटै कार्यक्रममा सहभागी हुन चिनेका मान्छे आएपछि उपसभामुखले अन्तर्वार्ताको समयका लागि पहल गरिदिएको बताएका छन्  । यधपी यस्तो कुरालाई पनि ठूलो राजनीतिक इस्यु बनाएर राजनीतिक स्वार्थ साध्ने काम गरिन्छ भने रास्वपालाई स्वीकार्य नहुने उनले सञ्चार माध्यमसंगको कुराकानीमा बताएका छन्। रास्वपा कार्यालको आन्तरिक छलफलमा उपसभामुख रानाले उक्त हस्ताक्षर आफ्नो नभएको र आफूले कसैलाई सिफारिस नगरेको प्रस्टीकरण दिएपनि उक्त विवाद सतहमा आएपछि विभिन्न सञ्चार माध्यमसंग गरेको कुराकानीमा भने उनले उक्त पत्र लेखेको स्वीकार गरेकी छिन्।