काठमाडौँ- बागमती प्रदेशका मुख्यमन्त्री शालिकराम जमकट्टेलले आगामी ६ गते आइतबार प्रदेशसभामा विश्वासको मत लिने भएका छन् ।

मुख्यमन्त्री जमकट्टेलले मतदानको व्यवस्था गर्न प्रदेश सभा सचिवालयलाई औपचारिक अनुरोध गरेका छन् ।

सत्तारुढ दलका नेताहरुसँगको छलफलपछि ६ गते विश्वासको मत लिने निर्णय भएको नेपाल कम्युनिष्ट पार्टी (माओवादी केन्द्र)का प्रमुख सचेतक रत्नप्रसाद ढकालले जानकारी दिए ।

सङ्घीय सरकार परिवर्तनपछि नेकपा एमालेका पाँच मन्त्रीले प्रदेश सरकारबाट राजीनामा दिएपछि प्रदेश सरकारले बहुमत गुमाएको थियो । सभामुख भुवनकुमार पाठकले विश्वासको मतका लागि ६ गते दिउँसो १ बजे प्रदेशसभाको बैठक बोलाउने घोषणा गरेका छन् ।

माओवादी केन्द्रका नेता जमकट्टेल नेकपा (एमाले), राष्ट्रिय प्रजातन्त्र पार्टी र नेपाल कम्युनिष्ट पार्टी (एकीकृत समाजवादी) को समर्थनमा मुख्यमन्त्री भएका थिए ।