काठमाडौं : सपथ ग्रहणकै दिन २२ सदस्यीय मन्त्रिमण्डल विस्तार गरेको ओली सरकारको पहिलो मन्त्रिपरिषद बैठकले सरकार र राज्य संचालनका लागि विभिन्न निर्णयहरु गरेको छ।

प्रधानमन्त्री केपी शर्मा ओली नेतृत्वको मन्त्रिपरिषदको पहिलो बैठकले मन्त्रिपरिषद बैठकका निर्णयहरू अब २४ घन्टा गोप्य राखिने निर्णय गरिएको छ । सरकारका प्रवक्ता पृथ्वीसुब्बा गुरुङका अनुसार कतिपय निर्णय सच्याउनुपर्ने अवस्था आउनसक्ने भएकाले २४ घन्टासम्म निर्णय गोप्य राख्न निर्णय गरिएको हो।

सरकारले बाढी पहिरोका कारण भएको जनधनको क्षतिप्रति दुःख व्यक्त गर्दै मृत्यु भएकाहरूको परिवारलाई राहत उपलब्ध गराउने निर्णय गरेको छ।

बैठकले मन्त्रीपरिषद तथा मन्त्रिपरिषदका विभिन्न समितिहरूमा प्रक्रियामा रहेका वा प्रक्रियामा नलगिएका सम्पूर्ण प्रस्तावहरू, सम्बन्धित मन्त्रालयमा फिर्ता गर्ने निर्णय गरेको छ ।

त्यसैगरी, २०८२ असार मसान्त सम्म नेपाललाई सडक बालबालिका मुक्त बनाउने बैठकले निर्णय गरेको छ।

कीर्तिपुर क्रिकेट मैदानलाई अन्तर्राष्ट्रिय मापदण्डअनुसार फ्लडलाइट जडान र प्याराफिट निर्माण कार्य तीन सय दिन भित्र सम्पन्न गर्ने निर्णय समेत गरेको सरकारका प्रवक्ता पृथ्वीसुब्बा गुरुङले जानकारी दिएका छन् ।

त्यस्तै जाजरकोट भूकम्प प्रभावितहरूलाई दोस्रो र तेस्रो किस्ता उपलब्ध गराउने निर्णय गरेको छ भने प्रधानमन्त्री तथा मन्त्रिपरिषद्का सचिव लिलादेवी गर्तौलालाई कायममुकायम मुख्यसचिवको जिम्मेवादी दिने निर्णय गरेको छ।

बैठकमा प्रधानमन्त्री केपी ओलीले मन्त्रालयबीच समन्वयका साथ अघि बढ्न निर्देशन दिँदै एक महिनाभित्र परिणाममुखी काम गरेर देखाउन पनि मन्त्रीहरूलाई निर्देशन दिएको सरकारका प्रवक्ता गुरुङले बताएका छन्।