गाजाका अधिकारीहरूका अनुसार प्यालेस्टिन लक्षित इजरायली मिसाइलहरूले नुसेरात शरणार्थी शिविरमा विस्थापित मानिसहरूका लागि एउटा विद्यालयमा आश्रय लिइरहेका १७ प्यालेस्टाइनीको मृत्यु भएको छ भने ८० जना घाइते भएका छन्।

यसअघि पनि इजरायलले अल-मावासी शिविरमा आश्रय लिइरहेका ९० जनाको ज्यान जानेगरि आक्रमण गरेको थियो।

ब्राजिलका राष्ट्रपति लुइज इनासियो लुला दा सिल्भाले गाजामा “अन्तहीन नरसंहार” को निन्दा गर्दै तथाकथित “सुरक्षित क्षेत्रहरू” मा इजरायलको “लगातार आक्रमण” को निन्दा गरेका छन्।

इजरायली पक्षले युद्धविरामको लागी हमासले वार्ता अस्विकार गरेको आरोप लगाइरहेको बेला, हमासको राजनीतिक कार्यालयका सदस्य इज्जत अल-रिशेकले भने युद्धविराम वार्ता अस्विकार गरेको कुरा इजरायलको गलत प्रचार भएको बताएको छ।

अक्टोबर ७ देखि गाजामा इजरायलको युद्धमा कम्तिमा ३८,४४३ व्यक्तिको मृत्यु भएको छ भने ८८,४८१ घाइते भएका छन्। अक्टोबर ७ मा हमासको नेतृत्वमा भएको आक्रमणमा इजरायलमा मर्नेको संख्या १,१३९ रहेको अनुमान गरिएको छ, र दर्जनौं व्यक्ति अझै पनि गाजामा बन्दी छन्।