काठमाडौं – उद्योग विभागले चालु आर्थिक वर्षको ११ महिनामा रु दुई खर्ब ५० अर्बभन्दा बढी लगानी गर्ने प्रतिबद्धता पुष्टि गरेको छ ।

यस अवधिमा ३ सय ८३ उद्योग दर्ता भएका छन् । विभागले बुधबार सार्वजनिक गरेको तथ्यांकअनुसार नयाँ दर्ता भएका उद्योगमध्ये ४९ ठूला उद्योग, ५० मध्यम उद्योग र २८४ साना उद्योग रहेका छन् ।

११ महिनाको अवधिमा दर्ता भएका उद्योगहरूले दुई खर्ब १७ अर्ब रुपैयाँको लगानी प्रतिबद्धता प्राप्त गरेका छन् ।

डिओआईका अनुसार जेठ मसान्तदेखि मध्य असार सम्ममा मात्रै ३२ अर्ब २० करोडको लगानी प्रतिबद्धतासहित ५९ उद्योग दर्ता भएका छन् ।

स्वदेशी तथा विदेशी लगानी भित्र्याउने उद्देश्यले सरकारले गरेको लगानी सम्मेलनपछि वैशाखदेखि असार मसान्तसम्ममा नौ ठूला उद्योग दर्ता भएको विभागले जनाएको छ ।

त्यसैगरी यस वर्ष कुल ३ सय ५५ कम्पनीलाई प्रत्यक्ष वैदेशिक लगानी (एफडीआई) स्वीकृत गरिएको छ । ।

विभागका अनुसार नयाँ दर्ता भएका उद्योग र सरकारले स्वीकृत गरेको स्वदेशी लगानीले २६ हजार २७ जनालाई रोजगारी दिनेछ । त्यसैगरी विदेशी लगानीमा दर्ता भएका उद्योगले १७ हजार ६ सय ४२ जनालाई रोजगारी दिने अपेक्षा गरिएको छ ।

यस अवधिमा दुई वटा प्याटेन्ट दर्ता, ५ हजार ४९४ ट्रेडमार्क दर्ता, ४५ वटा प्रारम्भिक वातावरणीय मूल्याङ्कन र ८९ वटा ट्रेडमार्क सम्बन्धी मुद्दा दर्ता भएको विभागको तथ्यांकमा उल्लेख छ ।