वासिङ्टनले इराक, सिरिया र यमनमा गैरकानूनी हमला गरेर मध्यपूर्वमा द्वन्द्वको आगो फैलाएको र शान्ती प्रक्रिया बिथोल्न खोजेको संयुक्त राष्ट्रसंघका लागि रुसी स्थायी प्रतिनिधि भासिली नेबेन्जियाले बताएका छन् ।

जोर्डनमा अमेरिकी सैन्य चौकीमा ड्रोन आक्रमणको जवाफमा अमेरिकाले सिरिया र इराकमा हवाई हमला गरेपछि रुसले संयुक्त राष्ट्र सुरक्षा परिषदको तत्काल बैठक बोलाउन अनुरोध गरेको छ।

नेबेन्जियाले सोमबार न्यूयोर्कमा भएको (युएनएससी) बैठकमा हाल अमेरिकाले गरेको बम विस्फोटले मध्य पूर्वमा अमेरिकी नीतिको आक्रामक प्रकृति र वाशिंगटनले अन्तर्राष्ट्रिय कानूनी मापदण्डको पूर्ण उपेक्षा गरेको कुरा प्रष्ट भएको बताएका छन्।

अमेरिका अन्तर्राष्ट्रिय शान्ति र सुरक्षाको लागि प्रत्यक्ष खतरा साबित भएको र संयुक्त राष्ट्रको केन्द्रीय भूमिकालाई कमजोर पार्ने हमलाहरू सञ्चालन गरेर आगोमा पेट्रोल खन्याइरहेको समेत भासिली नेबेन्जियाले बताएका छन् । दमास्कसले आफ्नो सिमानामा अमेरिकी सैन्य उपस्थितिलाई अधिकार नदिएको उल्लेख गर्दै , सिरियामा रहेका अमेरिकी आधारहरू “अवैध” भएको समेत बताएका छन्।