काठमाडौं – रिक्त रहेका विभिन्न २५ पदका लागि उपनिर्वाचन हुने विषयमा उपप्रधानमन्त्री तथा रक्षामन्त्री पूर्णबहादुर खड्कासँग प्रमुख निर्वाचन आयुक्त दिनेशकुमार थपलियाले छलफल गरेका छन् ।सिंहदरबारमा रक्षा मन्त्रालयमा भएको भेटमा थपलिया र खड्काबीच हालै सम्पन्न राष्ट्रियसभा निर्वाचन र आगामी उपनिर्वाचनका विषयमा छलफल भएको उपप्रधानमन्त्रीको सचिवालयले जनाएको छ ।

निर्वाचन आयोगले प्रतिनिधिसभा र प्रदेशसभा सदस्यको निर्वाचन र स्थानीय तहको रिक्त पदको उपनिर्वाचनका लागि सरकारसँग परामर्श गर्न सक्ने संवैधानिक व्यवस्था रहेको छ ।आयोगले यही वैशाख मसान्तभित्र उपनिर्वाचन गराउन सरकारलाई सुझाव दिएको छ ।इलाम क्षेत्र नं २ मा प्रतिनिधिसभा सदस्यका लागि र बझाङ क्षेत्र नं १ मा सुदूरपश्चिम प्रदेशसभा सदस्यका लागि उपनिर्वाचन हुँदैछ । एमाले नेता सुवासचन्द्र नेम्वाङको निधनपछि इलाम क्षेत्र नम्बर २ को सिट रिक्त भएको थियो । यसैबीच, बझाङ क्षेत्र नं १ को सुदूरपश्चिम प्रदेशसभा सदस्य नेपाली काँग्रेसका प्रदेशसभा सदस्य पृथ्वीबहादुर सिंहको सडक दुर्घटनामा मृत्यु भएपछि सो क्षेत्र पनि खाली भएको छ ।

निर्वाचन आयोगले हाल प्रतिनिधिसभामा एक, सुदूरपश्चिम प्रदेशसभामा एक, जिल्ला समन्वय समितिका दुई प्रमुख, एक नगरपालिकाका उपमेयर, एक गाउँपालिकाको अध्यक्ष, दुई गाउँपालिकाका उपाध्यक्ष र विभिन्न स्थानीय तहका १७ वडाध्यक्ष गरी २५ पद रिक्त रहेको जनाएको छ ।