अमेरिकाले १५ वर्षमा पहिलो पटक बेलायतमा आणविक हतियार तैनाथ गर्ने योजना बनाएको छ, पेन्टागनका कागजातहरू उद्धृत गर्दै टेलिग्राफले रिपोर्ट गरेको छ। यद्यपि अमेरिकी रक्षा अधिकारीले उक्त रिपोर्टको पुष्टि वा खण्डन भने गरेका छैनन्।

युक्रेन द्वन्द्वलाई लिएर नाटो र रसियाबीच बढेको तनाव र मस्कोसँग सम्भावित सशस्त्र द्वन्द्वको तयारी गर्न केही पश्चिमी राजनीतिज्ञहरूले आह्वान गरेको बेला यो रिपोर्ट आएको हो।

बेलायती अखबारले सफोकको लेकेनहेथस्थित रोयल एयर फोर्स स्टेशनमा नयाँ सुविधाको लागि खरिद सम्झौताहरू भएको उद्धृत गर्दै आणविक हतियारहरू ल्याउने तयारी भएको बताएको छ । लेकन्हीथमा राखिने भनिएको बि६१-१२ आणविक बम १९४५ मा हिरोशिमामा खसालेको भन्दा तीन गुणा बढी शक्तिशाली रहेको टेलिग्राफले बताएको छ । अमेरिकाले गत वर्ष मात्र एफ-३५ नामक आणविक क्षमता भएका लडाकु विमानहरू उक्त बेसमा पठाएको थियो।

रुसी विदेश मन्त्रालयका प्रवक्ता मारिया जाखारोभाले गत वर्ष अमेरिकी आणविक हतियार बेलायतमा राखेमा मस्कोले आफ्नो सुरक्षा सतर्कतालाई ध्यानमा राख्दै प्रतिकार्य गर्न बाध्य हुने बताएकी थिइन्। रुसले पश्चिममाथि युरोपमा तनाव निम्त्याएको आरोप लगाएको छ र नाटोको पूर्वतर्फ विस्तार युक्रेन द्वन्द्वको मूल कारण भएको समेत बताएको छ।

यता,जर्मन रक्षामन्त्री बोरिस पिस्टोरियस लगायतका उच्च पदस्थ युरोपेली अधिकारीहरूले रुससँग सम्भावित युद्धका लागि तयारी गर्नुपर्ने आवश्यकता रहेको बताएका छन्। गत हप्ता नाटो सैन्य समितिका अध्यक्ष, एडमिरल रोब बाउरले ब्लकलाई प्रत्यक्ष टकरावको लागि “पूरै स्पेक्ट्रममा तयार” हुन आग्रह समेत गरेका छन् ।