सुरक्षाको विषयलाई लिएर विवाद उत्पन्न हुँदा त्रिभुवन अन्तर्राष्ट्रिय विमानस्थलका प्रहरीले विमानस्थल अध्यागमन कार्यालयका प्रमुखसहित अध्यागमन अधिकृतमाथि हातपात गरेको छ ।

शुक्रबार अध्यागमन अधिकृत छायाँलाल मोक्तानलाई चेकजाँच गर्ने क्रममा उनले अध्यागमनका कर्मचारीको चेकजाँच गर्ने तर प्रहरीको नगर्ने भन्ने विषयालाई लिएर चर्किएको विवादमा प्रहरीले उनीमाथि हातपात गरेको बताइएको छ।

मोक्तानले आफूमाथि प्रहरीले दुर्व्यवहार गरेको विषय अध्यागमन कार्यालयका प्रमुख गोगनबहादुर हमाललाई बताएका र हमालले घटनाको वास्तविकता बुझ्न सीसी क्यामेरा हेर्दा सीसी क्यामेरामा स्पष्टरूपमा प्रहरीले अध्यागमन अधिकृत मोक्तानलाई मुक्का प्रहार गरेको देखेपछि ‘यो त प्रहरीले अति गर्‍यो?’ भनेर प्रतिक्रिया दिनासाथ त्यहाँ खटिएका प्रहरीले हमालमाथि नै आक्रमण गरेको बताइएको छ ।

घटनापछि अध्यागमनका अधिकारीहरुले प्रहरीको डीएसपी र अध्यागमनका उपसचिव सँगै प्रवेश गर्‍यो भने प्रहरीले अध्यागमनका उपसचिवको जीउ खानतलासी गर्छ,तर डीएसपीलाई गर्दैन,त्यसै छोडिदिन्छ भन्ने गुनासो समेत गरेका छन्।

उक्त घटनापछि, विमानस्थलबाट हुने अधिकांश तस्करीमा प्रहरीको मिलेमतो देखिँदै आएको र उनीहरूलाई नै सुरक्षामा छुट दिन नहुने अध्यागमनका अधिकारीले बताएका छन् ।