सुदूरपश्चिम र जनकपुरमा राष्ट्रियसभा सदस्य निर्वाचनको मतगणना सुरु भएको छ । सात प्रदेशका १४ वटै मतदान केन्द्रमा बिहान ९ बजेबाट सुरु भएको मतदान दिउँसो ३ बजे सकिएको हो ।

जनकपुरमा ९९.३२ प्रतिशत मत खसेको निर्वाचन आयोगले जनाएको छ । आयोगका प्रवक्ता शालिग्राम शर्मा पौडेलले मतदान शान्तिपूर्ण भएको र साँझ ८ बजेसम्म सबै नतिजा आउने जानकारी दिए ।

त्यसैगरी,सुदूरपश्चिम प्रदेशको निर्वाचनमा स्थानीय तहका दुई प्रतिनिधि, धनगढी उपमहानगरपालिका प्रमुख गोपाल हमाल र कैलालीको भजनी नगरपालिकाका उपप्रमुख राजु तिरुवा मतदानमा सहभागी नभएकाे निर्वाचन अधिकृतको कार्यालयले जनाएको छ।सुदूरपश्चिम प्रदेश सभाका ५२ जना सदस्यले मतदान गरेका छन्। त्यस्तै, एक सय ७३ जना स्थानीय तहका प्रमुख, उपप्रमुखले मतदान गरेका प्रदेश निर्वाचन कार्यालयका निमित्त प्रमुख प्रेम भट्टले जानकारी दिए।

अन्य प्रदेशमा पनि सर्वदलीय बैठक सुरु भएको र अबको केहि घण्टामा सबै प्रदेशमा मतगणना सुरु हुने निर्वाचन आयोगले बताएको छ ।

राष्ट्रियसभाका १९ सिटका लागि आज भएको निर्वाचनको मतगणना हुँदैछ र एक जनालाई राष्ट्रपतिले मनोनयन गर्नेछन् । १९ सिटका लागि आठ टोलीबाट ५१ उम्मेदवार प्रतिस्पर्धा गर्दैछन् ।