काठमाडौं – दूरसञ्चार सेवा प्रदायक कम्पनी एनसेलबाट एक्जियटा ग्रुप बाहिरिने भएको छ।

एक्जियटा ग्रुपका प्रमुख कार्यकारी अधिकृत तथा प्रवन्ध निर्देशक विवेक सुदले एक्जियटा ग्रुपको बोर्ड बैठकले नेपालबाट बाहिरिने निर्णय गरेको बताएका छन् ।

एनसेलमा ८० प्रतिशत सेयर रहेको एक्जियटाले आफ्नो सेयर बिक्रीका लागि राखेको र उक्त सेयर नेपाली साझेदारहरू सतिशलाल आचार्य र सचिनलाल आचार्यले किन्ने तय भएको छ ।हाल एनसेलमा आचार्यद्वयको २० प्रतिशत सेयर छ ।

नेपालमा पहिलो पटक २००४ मा ‘मेरो मोबाइल’ को रूपमा स्थापित भएको दूरसञ्चार सेवा प्रदायक कम्पनी एनसेललाई चार वर्षपछि टेलिया कम्पनी (पहिले स्विडेनको टेलियासोनेरा समूह भनेर चिनिन्थ्यो) द्वारा अधिग्रहण गरेर २०१० मा ‘एनसेल’ को रूपमा पुन: ब्रान्ड गरिएको थियो । १२ अप्रिल २०१६ मा आजियाटाको हिस्सा बन्न पुगेको एनसेल पछि गएर पब्लिक लिमिटेड कम्पनीमा परिणत भयो र ३ अगस्ट २०२० मा यसको नाम ‘एनसेल आजियाटा लिमिटेड’ राखियो।