काठमाडौँ – वैदेशिक अध्ययन अनुमति शाखाका अनुसार अध्ययनको लागि विदेश जाने नेपाली विद्यार्थीको संख्या दिनानुदिन बढ्दै गैरहेको देखिन्छ।

वैदेशिक अध्ययन अनुमति शाखाको तथ्याङ्क अनुसार विदेश अध्ययन गर्न जानको लागि ०७९/८० मा मात्र ७० देशका लागि विद्यार्थीले अध्ययन अनुमतिपत्र लिएको देखिन्छ। जसमध्ये सबैभन्दा धेरै ३३ हजार नौ सय ९१ ले अस्ट्रेलिया, २१ हजार पाँच सय ७४ ले क्यानडा, १० हजार पाँच सय २७ ले बेलायत र तीन हजार नौ सय ७० विद्यार्थीले अमेरिका जान एनओसी लिएका छन् । यस आर्थिक वर्षमा मात्र एक लाख १० हजार दुई सय १७ विद्यार्थीले एनओसी लिएका छन्  भने, आर्थिक वर्ष ०८०/८१ को अढाई महिनामै २७ हजार विद्यार्थीले वैदेशिक अध्ययन अनुमतिपत्र (एनओसी) लिएका छन् ।

वैदेशिक अध्ययनमा जाने विद्यार्थीको संख्या बढ्दै जाँदा ०७९/८० मा मात्रै एक खर्ब ४२ करोड रुपैयाँ बिदेसिएको राष्ट्र बैंकले जनाएको छ  । त्यसअघि ०७८/०७९ मा ६७ अर्ब ७० करोड रकम विदेश पढ्न जानेहरूबाट बाहिरिएको थियो  भने,चालू आर्थिक वर्षको साउनमा मात्रै १० अर्ब ७५ करोड रुपैयाँ बाहिरिएको राष्ट्र बैंकले जनाएको छ।