धादिङ- पृथ्वी राजमार्गको नौबिसे–मलेखु सडकखण्ड असोज ४ गतेदेखि असोज २० गते सम्मको लागि रातिको समयमा बन्द हुने भएको छ ।

नौबिसे–मलेखु सडकखण्ड विस्तारको लागि सहजीकरण गर्न जिल्ला प्रशासन कार्यालय धादिङमा बसेको सरोकारवालाहरुको बैठकले नौबिसे–मलेखु सडकखण्डको खयरघारी र पोखरे खोला अन्तर्गत सडक चौडा गर्न रातिको ११ बजेदेखि बिहान ३ बजेसम्म उक्त सडक खण्ड बन्द रहने जनाएको छ।

सोमबार बसेको सरोकारवालाको बैठकले रातिको समयमा एम्बुलेन्स र सुरक्षा निकाय बाहेकका सार्वजनिक र निजी सवारी साधन पूर्णरुपमा बन्द गर्ने निर्णय गरेको हो ।

बैठकको निर्णय अनुसार काठमाडौँबाट जाने सवारीसाधन थाक्रे गाउँपालिका १ एक्लेफांटमा रोकिनेछ भने मुग्लिनतर्फबाट आउने सवारीसाधन गजुरी गाउँपालिका ५ घाटबेसी पुलमा रोकिनेछ।