काठमाडौँ- यही असोज ६ देखि २१ गतेसम्म चीनको हाङझाउमा हुने १९औं एसियाली खेलकुद प्रतियोगितामा सहभागिता जनाउन जाने नेपाली खेलाडी टोलीलाई प्रधानमन्त्री पुष्पकमल दाहाल ‘प्रचण्ड’ले सफलताको शुभकामना दिँदै बिदाइ गरेका छन्।

प्रधानमन्त्री कार्यालय बालुवाटारमा आयोजित बिदाइ कार्यक्रममा उनले प्रतियोगितामा नेपाली टोलीले राम्रो खेल प्रदर्शन गर्नेमा आफू विश्वस्त रहेको भन्दै यसअघि घोषणा गरिएको खेलाडीको पुरस्कार रकम प्राविधिक कारणले केही ढिला भएको भएपनि घोषित पुरस्कार रकम निकासा गर्ने बताएका छन्। कार्यक्रममा युवा तथा खेलकुदमन्त्री डिगबहादुर लिम्बूको पनि उपस्थिति रहेको थियो।

यसपटकको एसियाली खेलकुदमा नेपालका तर्फबाट २९ खेलमा २ सय ५३ खेलाडीको सहभागिता रहनेछ। जसमा १ सय २७ महिला र १ सय २६ पुरुष खेलाडी सहभागी छन्।