काठमाडौँ- हेटौँडा उपमहानगरपालिका– १ स्थित सञ्चो हस्पिटलका डा. विकास थापा र डा. प्रशान्त बिडारीमाथि भएको कुटपिटको घटनालाई लिएर नेपाल चिकित्सक संघले चिकित्सकमाथि आक्रमण गर्नेलाई कानुनबमोजिम कारबाही गर्न माग गर्दै प्रधानमन्त्री समक्ष ज्ञापनपत्र बुझाएका छन्। प्रधानमन्त्री पुष्पकमल दाहालले उक्त ज्ञापनपत्र बुझ्दै चिकित्सकमाथि आक्रमण गर्नेलाई कारबाही गरिने बताएका छन्।

संघका अध्यक्ष डा. अनिलविक्रम कार्कीको नेतृत्वमा गएको टोलीले प्रधानमन्त्रीलाई ज्ञापनपत्र बुझाएको हो। ज्ञापनपत्रमा स्वास्थ्यकर्मी तथा स्वास्थ्य संस्थाको सुरक्षासम्बन्धी पहिलो संशोधन ऐन २०७९ अनुसार कानुनी कारबाही गर्न माग गरिएको छ।

उक्त घटनाको विषयलाई लिएर, संघले नियमित रूपमा उपचार प्रक्रियालाई इमान्दारीपूर्वक पालना गरी थप सुविधा सम्पन्न अस्पतालमा बिरामीलाई पठाइएको र बिरामीको मृत्यु भएको घटनालाई अतिरञ्जित गरी चिकित्सकलाई हातपात गर्नेजस्तो अस्वाभाविक र अमानवीय घटनाप्रति आपत्ति जनाउँदै दोषीलाई पहिचान गरी कानुनी दायरामा ल्याउन माग गरेको छ।

डेंगु संक्रमण भएपछि थप उपचारका लागि सन्चो अस्पतालबाट चिकित्सकहरूले बिरामीलाई चितवन ‘रिफर’ गरेको र उपचारका क्रममा बिरामीको निधन भएपछि हस्पिटलका डा. विकास थापा र डा. प्रशान्त बिडारीमाथि आक्रमण भएको थियो।

चिकित्सक कुटपिट घटनामा संलग्नभएको आरोपमा प्रहरीले रमा प्रधान, रमिता प्रधान, रोहित प्रधान र अनुप प्रधानलाई पक्राउ गरेको छ।