काठमाडौँ- सीआईबीले सुन तस्करीबारे अनुसन्धान गरेको प्रतिवेदन आज सरकारी वकिलको कार्यालय, काठमाडौंमा बुझाउँदैछ ।सुन तस्करी अनुसन्धानको प्रतिवेदन सरकारी वकिलको कार्यालयमा बुझाउनु अघि आयोजित पत्रकार सम्मेलनमा सीआईबीले सुन तस्करी प्रकरणमा ५० जनालाई प्रतिवादी बनाएको र ब्रेक शुमा लुकाएर ३०२ किलो सुन तस्करी गरेको निष्कर्ष निकालेको छ ।ब्रेक शुको तौल यकिन गरेर ३०२.६२ किलो थप सुन तस्करी गरि ल्याएको सीआईबीको निष्कर्ष रहेको छ।

सुन प्रकरणका ५० जना प्रतिवादीमध्ये हालसम्म ३२ जना पक्राउ परेको र १८ जना फरार रहेको सीआईबीले जनाएको छ। पक्राउ परेकामध्ये २३ जना नेपाली र ९ जना विदेशी नागरिक छन्। फरार हुनेमा १४ विदेशी र ४ नेपाली छन्। सुन प्रकरणमा सीआईबीले ३ अर्ब ५० करोड २ लाख १६ हजार ५५२ रुपैयाँ बिगो माग गरी अनुसन्धानको प्रतिवेदन तयार गरेको छ।

सीआईबीले आरोपीविरुद्ध सङ्गठित अपराध,सुन चोरी पैठारी र राष्ट्र बैंक ऐनअन्तर्गतलगायत कसुरमा मुद्दा चलाउन राय दिएको छ।यसअघि ब्रेक शुसहितको एक सय ५५ किलो भनिएको सुन गाल्दा ६० किलो सात सय १६ ग्राम पुगेको थियो।