पर्सा- वीरगन्जको बाल सुधार गृहमा रहेका बालकबीच झडप हुँदा ११ जना बालक र तीन जना प्रहरी घाइते भएका छन्।

भक्तपुरको बाल सुधार गृहबाट ल्याइएका १८ जना र वीरगन्जको वीर्तास्थित बाल सुधार गृहमा पहिलेदेखि बस्दै आएका बालकहरुबीच मंगलबार राति विवाद भइ झडप हुँदा सुधारगृह रातभर तनावग्रस्त बनेको थियो। बालकहरुको झडपका क्रममा भक्तपुरबाट ल्याइएका मध्ये १० र वीर्तास्थित बाल सुधार गृहका १ जना गरी ११ जना बालक घाइते भएका छन् भने उनीहरुले प्रहार गरेको ढुंगा लागेर तिन जना प्रहरी समेत घाइते भएका छन्।

घाइते भएका सुधार गृहका ११ जना बालकलाई मंगलबार राति नारायणी अस्पतालमा उपचार गराइ जिल्ला प्रहरी कार्यालयमा ल्याएर राखिएको प्रहरीले जनाएको छ।

भक्तपुरबाट ल्याएर राखिएका बालकहरुले वीर्तास्थित सुधार गृहका नाइकेसँग विवाद गरेर कुटपिट गरेपछि झडप सुरु भएको बताइएको छ । झडपको स्थिति नियन्त्रणमा लिन नेपाल प्रहरी र सशस्त्र प्रहरी ठूलो संख्यामा सुधार गृहमा पुगेको र केही राउण्ड अश्रु ग्याँस समेत प्रहार गरेको प्रहरीले जनाएको छ।

सुधार गृहमा प्रदर्शन गरिरहेका बालकहरुले भने सुधारगृहमा आफूहरुलाई खाना राम्रो नदिएको , घरमा फोन गर्दा एक कलको १ सय रुपैयाँ लिने गरिएको , एउटै कोठामा धेरै जनालाई कोचेर राखिएको , शौचालय पनि राम्रो नभएको , सुधार गृह प्रमुखले यातना दिंदै आएको जस्ता आरोप समेत लगाएका छन्।वीर्तास्थित बाल सुधार गृहमा पहिलेदेखि नै १३१ जना बालक बस्दै आएका छन्।