काठमाडौँ- झण्डै एक महिना अघिदेखि नियमित रुपमा सुचारु हुन नसकी अवरुद्ध बनेको प्रतिनिधिसभाको बैठक आज दिउँसो १ बजे बस्ने भएको छ।

प्रमुख प्रतिपक्ष दल नेकपा एमालेले सुन तस्करी प्रकरणमा उच्चस्तरीय छानबिन समिति गठन गर्नुपर्ने मागसहित अवरुद्ध गर्दै आएको संसद बैठक नियमित कार्यसूचीमा प्रवेश नै नगरी बन्द हुँदै आएको छ। संसदको नियमित तालीका बमोजिम आज दिउँसो १ बजे पुन:संसद बैठक आहवान गरिएको छ। प्रधानमन्त्री दाहालले आजबाट नियमित रुपमा संसद सुचारु हुने बताएका छन्। यधपी, आज पनि संसद सुचारु गर्न प्रमुख प्रतिपक्ष दल नेकपा एमालेको भूमिका प्रमुख रहने देखिन्छ।

सुन तस्करी प्रकरणमा उच्चस्तरीय छानबिन समिति गठन गर्नुपर्ने मागसहित संसद अवरुद्ध गर्दै आएको एमालेले सदनमा आफुलाई कुन रुपमा प्रस्तुतु गर्छ भन्ने कुराले आजको संसद बैठकको नियमिततालाई निर्धारण गर्दछ। आजको बैठकका लागि सभामुख देवराज घिमिरेले राष्ट्रपति कार्यालयबाट प्राप्त कार्यभार तोकिएको र विधेयक प्रमाणीकरण सम्बन्धी पत्रहरूको व्यहोरा पढेर सुनाउनेसहित विभिन्न ८ वटा सम्भावित कार्यसूची तयार गरिएको छ।