श्रावण २४, काठमाडौँ- केहिदिन यता लगातार परेको अविरल वर्षाको कारण देशभरको जनजीवन प्रभावित बनेको छ। अविरल वर्षाको कारण देशको राजधानी काठमाडौँ लगायत अन्य जिल्लाहरुमा बाढी र पहिरोको जोखिम बढ्दै गएको छ भने, पहिरोको कारण देशका विभिन्न भागमा मुख्य सडकखण्डहरु अवरुद्द हुन पुगेको छ। मौसम सफा नहुँदा देशका धेरैजसो गन्तब्यमा नियमित रुमा हवाई सेवाहरु पनि सुचारु हुन सकेको छैन।

अविरल वर्षासँगै आएको बाढी र पहिरोमा परि मृत्यु हुने र बेपत्ता हुनेहरुको संख्या पनि बढ्दै गएको छ भने लाखौँ बराबरको धनजनमा क्षती पुगेको छ। सहरीकरण धान्ने ढल निकास र आकाशे पानी सोस्ने पर्याप्त खुला जमिन नहुँदा एक घण्टामा ३० मिलिमिटर वर्षा हुँदा नै काठमाडौं जलमग्न हुने गर्दछ। काठमाडौं उपत्यका भएर बग्ने नदीमा जल सतहले खतराको तह नाघ्दा तटीय क्षेत्रहरू डुबानमा परेका छन् । मंगलबार वाग्मती, मनोहरा, धोबीखोला, विष्णुमतीलगायत नदीले खतराको तह पार गर्दा उपत्यकाका विभिन्न स्थान डुबानमा परेका छन्। काठमाडौँको टुकुचा खोला, धोबीखोला करिडोर , कपन, सामाखुसी , टेकु, बल्खुलगायत क्षेत्रका नदीखोला किनार, आसपासका बस्तीहरु डुबानमा परेका छन्।भक्तपुर आसपासका नदीमा जल सतह बढेपछि भक्तपुरको हनुमान घाट, राम मन्दिर क्षेत्र, शान्ति निकेतन स्कुल, सिद्धि स्मृति अस्पताल डुबानमा परेका छन्।

त्यसैगरी ,भारी वर्षासँगै आएको बाढी र पहिरोबाट सर्लाही, धनुषा र मकवानपुरमा गरी ४ जनाको मृत्यु भएको छ भने ७ जना बेपत्ता भएका छन् । तराईमा बाढी र पहाडमा पहिरोको जोखिम बढेको छ । कैलालीमा मात्रै ५ सय घरपरिवार डुबानमा परेका छन् ।वर्षाका कारण देशभरका चार राजमार्गका विभिन्न खण्ड पूर्ण र ३४ आंशिकरूपमा अवरुद्ध भएका छन्।भीमदत्त राजमार्गको दुई सय मिटर सडक भासिँदा सुदूरपश्चिमका ७ पहाडी जिल्लाबाट तराईसँगको यातायात ठप्प भएको छ ।

यस वर्ष बाढी तथा पहिरोबाट वाग्मती प्रदेशभरका करिब २२ हजार घरधुरी र ९७ हजारभन्दा बढी जनसंख्या प्रभावित हुने आकलन गरिएको छ । प्रहरीका अनुसार काठमाडौं उपत्यकामा पछिल्लो तीन वर्षमा मात्रै बाढीका कारण ३९ जनाको डुबेर र बगेर मृत्यु भएको छ ।