इस्लामिक स्टेट-खोरासान आतंककारी समुहले पाकिस्तानको खैबर पख्तुनख्वा प्रान्तमा आइतवार भएको आत्मघाती बम विष्फोटको जिम्मेवारी लिएका छन्। उक्त समुहले सो विष्फोट जमियत उलेमा-ए-इस्लाम (जेयुआइ ) पार्टीको चुनावी र्‍यालीलाई लक्षित गरेको बताएको छ ।

इस्लामिक स्टेट-खोरासान भनेर चिनिने समूहले सोमबार विष्फोटको जिम्मेवारी लिएको एक विज्ञप्ति जारी गरेको छ।जेयुआइ नेता फजल-उर-रहमानले भाषण गर्ने कार्यक्रमको मञ्च नजिकै करिब १००० जनाको भिडमाझ उक्त समुहले आत्मघाती बम विष्फोट गराएको थियो।

विष्फोटमा परि सोमबार साँझसम्म, मृत्यु हुनेको संख्या ५४ पुगेको छ , जसमध्ये २३ जना १८ वर्ष मुनिका थिए।

अगस्ट २०२१ मा अफगानिस्तानबाट अमेरिकी सेना फिर्ताको क्रममा १३ अमेरिकी सैनिक र दर्जनौं अफगान नागरिकको ज्यान लिने गरि काबुल एयरपोर्टमा भएको आत्मघाती बम विष्फोटको पछाडि पनि इस्लामिक स्टेट-खोरासान समुहको हात रहेको थियो।