श्रावन ४, काठमाडौँ- सुनको मूल्यले अहिलेसम्मको रेकर्ड तोडेर सबैभन्दा उच्च मूल्य कायम भएको छ । नेपाली बजारमा बिहीबार सुनको मूल्य प्रतितोला १ लाख १३ हजार ६ सय रुपैयाँ कायम भएको नेपाल सुनचाँदी व्यवसायी महासंघले जनाएको छ ।

यसअघि गत जेठ १८ गते प्रतितोला १ लाख १३ हजार ३ सय रुपैयाँको उच्च मूल्य रेकर्ड रहेको थियो । अघिल्लो दिनको तुलनामा बिहीबार सुनको मूल्य प्रतितोला ५ सय रुपैयाँले बढेको हो ।

अन्तर्राष्ट्रिय बजारमा सुनको मूल्य बढेसँगै नेपाली बजारमा पनि सुनको मूल्य बढेको भएपनि अन्तर्राष्ट्रिय बजारको तुलनामा नेपालमा सुनको मूल्य वृद्धिदर उच्च देखिएको छ ।

बुधबार प्रतितोला १४९० रुपैयाँमा कारोबार भएको चाँदीको मूल्य भने बिहीबार १४९५ कायम भएकाे महासंघले जनाएको छ ।