श्रावण २ , काठमाडौं – सरकारले ल्याएको मिटरब्याजसम्बन्धी नयाँ विधेयकप्रति असन्तुष्ट जनाउँदै मिटरब्याज पीडितहरुले उपप्रधानमन्त्री तथा गृहमन्त्री नारायणकाजी श्रेष्ठको राजीनामा माग गर्दै काठमाडौंमा प्रदर्शन गरेका छन्।

सरकारले ल्याएको मिटरब्याजसम्बन्धी नयाँ विधेयकले मिटरब्याज पीडितको समस्या समाधान नहुने र विधेयक पीडितको पक्षमा नभएको भन्दै पिडितहरुले प्रदर्शन गरेका हुन् ।काठमाडौंको शान्तिवाटिकादेखि सुरु भएको प्रदर्शन संसद भवन अगाडी पुगेर टुङ्गिएको थियो।

पिडितहरुले पहिलेको अध्यादेशमा धेरै कुरा ठीक रहेको, तर राजनीतिक दलहरुको सेटिङमा अध्यादेश निष्क्रिय पारेर परिमार्जन सहित आइतबार प्रतिनिधिसभाबाट पारित मिटरब्याजसम्बन्धी नयाँ विधेयक साहु महाजनको पक्षमा गएको बताएका छन्। शब्दमा हेरफेर गरेर आएको हालको विधेयक राजनीतिक दलहरुको सेटिंगमा साहु महाजनलाई नै सजिलो हुनेगरी तयार पारिएको उनीहरुले बताएका छन्।