श्रावण २, काठमाडौँ- विगतमा भएका सहमति कार्यान्वयन नभएको भन्दै बन्चरेडाँडा र सिसडोलका स्थानीयले ल्यान्डफिल्ड साइटमा फोहोर फाल्न अवरोध गरेका छन्। स्थानीयले फोहोर बोकेर ल्यान्डफिल साइट गएका गाडीलाई बाटोमै रोकेका छन्।

फोहोर विसर्जन गर्न अवरोध भएपछि फोहोर मैला व्यवस्थापन संघले सर्वोच्च अदालतमा दर्ता गरेको रिट उपर सुनुवाई गर्दै, सर्वोच्च अदालतले ल्यान्डफिलसाइट बञ्चरेडाँडामा फोहोर विसर्जन गर्न जाने टिपरलाई रोक्ने स्थानीय तहको निर्णय कार्यान्वयन नगर्न अन्तरिम आदेश दिएको भएपनि सर्वोच्चको आदेशको अवज्ञा गर्दै स्थानीयहरुले फोहोर बोकेर ल्यान्डफिल साइट गएका गाडीलाई बाटोमै रोकेका छन्।

मंगलबार उपत्यकाको फोहोर बोकेको कुनै पनि गाडी बन्चरेडाँडा र सिसडोल गएका छैनन् भने यता,अवरोध कारण देखाउंदै फोहोरमैला व्यवस्थापन संघले बुधबारदेखि काठमाडौंको फोहोर नउठ्ने जनाएको छ।काठमाडौं उपत्यकाबाट दैनिक ३८० वटा फोहोर बोकेको ट्रक बन्चरेडाँडा जाने महानगरले जनाएको छ।