असार २४, काठमाडौँ — प्रधानमन्त्री एवं माओवादी केन्द्रका अध्यक्ष प्रचण्ड, प्रमुख प्रतिपक्ष दल एमाले अध्यक्ष केपी शर्मा ओली र कांग्रेस सभापति शेरबहादुर देउवाबीच संसदको गतिरोध अन्त्य गर्ने विषयलाई लिएर प्रधानमन्त्री कार्यालय सिंहदरबारमा छलफल सुरु भएको छ ।

प्रधानमन्त्री पुष्पकमल दाहालले दिएको अभिव्यक्तिलाई लिएर निरन्तर राष्ट्रिय सभा र प्रतिनिधिसभा अवरुद्ध गर्दै आएको प्रमुख प्रतिपक्षी दल नेकपा (एमाले)ले राष्ट्रिय सभाको आइतबारको बैठक समेत अवरुद्ध गरेको छ ।

प्रधानमन्त्रीको राजीनामा माग्दै एमालेले दुई वटा प्रतिनिधिसभाका बैठक र तीन वटा राष्ट्रिय सभाका बैठक अवरुद्ध गरिसकेको छ ।एमालेले प्रधानमन्त्रीको राजीनामा नआएसम्म संसद चल्न नदिने अडान राख्दै आएको छ भने सत्ता गठबन्धनले संसदमा जवाफ फेस गर्ने निर्णय गरेका छन्।एमालेले संघीय संसद् भवनमा दिउँसो १ बजे बोलाइएको आजको बैठक पनि अवरोध गर्ने तयारी गरेको छ।