असार २२, काठमाडौँ- उपप्रधानमन्त्री तथा गृहमन्त्री नारायणकाजी श्रेष्ठले राजनीतिक नेतृत्वबाटै भ्रष्टाचारी संरक्षित रहने गरेको र भ्रष्टाचारमा राजनीतिक नेतृत्वकै संलग्नता रहने गरेको बताएका छन्।

निजी निवासमा पत्रकारहरुसँग कुरा गर्दै उनले सो कुरा बताएका हुन् । गृहमन्त्री श्रेष्ठले सुशासन र सम्वृद्धिको अभियानका लागि कडा कदम नचाली नहुने अवस्था रहेकाले आफूले समस्या समाधान गर्न आँट गरेको र सोहि अभियान अन्तर्गत गृहमन्त्री भएकै दिन सुराकी खर्च कटौती गर्ने निर्णय गरेको समेत बताएका छन्।

कसैले सही कामको लागि कुनै रकमको प्रयोग गरेपनि त्यो सही काममै प्रयोग हुन्छ भन्ने विश्वास गर्न नसकिने देशको राजनीतिक संस्कृति बनेको भन्दै, आन्तरिक सुशासनबिना समाजमा सुशासन स्थापित गर्छु भन्नु फगत कुरा मात्र रहेको बताउँदै उनले आन्तरिक सुशासनलाई पहिलो जोड दिनु पर्ने बताएका छन्।