भिजिट भिसामा विदेश जान लागेका ४५ जनालाई प्रहरीले त्रिभुवन अन्तर्राष्ट्रिय विमानस्थलबाट फर्काएको छ । भिजिट भिसामा विदेश जान लागेका ३० जना महिला र १५ जना पुरुषलाई मानव बेचबिखन अनुसन्धान ब्युरोले विमानस्थलबाट फर्काएको हो ।

फर्काइएकाहरु धेरैजसो संयुक्त अरब इमिरेट्स, कुवेत र ओमान जान लागेका थिए । फर्काइएकाहरुलाई कुन ठाउँमा जाने, कहाँ बस्ने जस्ता सामान्य विषयमा पनि जानकारी नभएको र भिजिट भिसामा मानव तस्करी गर्ने समूहले त्यसरी खाडीमा पठाउन खोजेको आशंकामा प्रहरीले उनीहरुलाई फ़र्काएको हो ।

जेठ महिनामा मात्र ब्युरोले भिजिट भिसामा जान लागेका नौ सय ४० जनालाई विमानस्थलबाट फर्काइसकेको छ । जसमा पाँच सय ४८ जना महिला रहेका छन् ।

भिजिट भिसामा हुने मानव बेचबिखन रोक्नकै लागि शंकास्पदहरूलाई रोक्दै आएको ब्युरोले जनाएको छ ।