हिमालयन एयरलायन्सको विमानमा शनिबार दुबईबाट काठमाडौं आइपुगेका तीन जनालाई करिब १५ तोला सुनसहित प्रहरीले पक्राउ गरेको छ।

त्रिभुवन अन्तराष्ट्रिय विमानस्थलको भन्सारमा खटिएको प्रहरीले मध्यपुर ठीमीका सुमन मगर, झापाकी विमला दर्जी र बुटवलकी सिर्जना रायमाझीलाई जाँचबुझको क्रममा सुनसहित पक्राउ गरेको हो।

सोधपुछको क्रममा उक्त सुन उनीहरुको नभएको र उनीहरुलाई भरियाको रुपमा मात्र प्रयोग गरिएको पत्ता लागेपछि प्रहरीले उनीहरूलाई नै प्रयोग गरेर सुन लिन आएका रामेछापका सुरेन श्रेष्ठलाई पनि पक्राउ गरेको छ।

पछिल्लो समय वैदेशिक रोजगारीमा गएकाहरूलाई प्रलोभन देखाएर सुनको भरिया बनाउने गिरोह नेपालमा सक्रिय रहेको र त्यसतर्फ विशेष निगरानी बढाएको प्रहरीले बताएको छ।