काठमाडौं, चैत १० : सरकारले नेपाल प्रहरीको नयाँ महानिरीक्षक (आईजी)मा वसन्तबहादुर कुँवरलाई नियुक्त गरेको छ ।

शुक्रबार बसेको मन्त्रिपरिषद्को बैठकले वसन्त बहादुर कुँवरलाई (आईजी)मा नियुक्त गर्ने निर्णय गरेको हो । प्रहरी महानिरीक्षक धिरजप्रताप सिंह, ३० वर्षे सेवाअवधिका कारण अनिवार्य अवकाशमा जाने भएपछि रिक्त स्थानमा कुँवरलाई नयाँ आईजीपीमा नियुक्त गरिएको हो ।

मन्त्रिपरिषद्को शुक्रबार बसेको बैठकले हालै डीआईजीबाट बढुवा भएका पाँच एआइजीमध्ये पहिलो नम्बरमा रहेका कुँवरलाई नेपाल प्रहरीको महानिरीक्षकमा नियुक्त गरेको हो ।

कुँवर, टेकप्रसाद राई, दीपक थापा, श्यामलाल ज्ञवाली र किरण बज्राचार्य हालै डीआईजीबाट एआईजीमा बढुवा भएका उच्च प्रहरी अधिकृत हुन् । यी सबै नेपाल प्रहरीको महानिरीक्षक पदका दावेदार थिए ।