तथ्यांक विभागले राष्ट्रिय जनगणना २०७८ को अन्तिम नतिजा सार्वजनिक गरेको छ । तथ्यांक विभागले सार्वजनिक गरेको अन्तिम तथ्यांक अनुसार नेपालको कुल जनसंख्या दुई करोड ९१ लाख ६४ हजार पाँच सय ७८ पुगेको छ।

तथ्यांक विभागले शुक्रबार आयोजना गरेको कार्यक्रम मार्फत प्रधानमन्त्री पुष्पकमल दाहालले अन्तिम नतिजा सार्वजनिक गर्नुभएको हो । विभागले सार्वजनिक गरेको तथ्यांकअनुसार सबैभन्दा धेरै जनसंख्या काठमाडौंको रहेको छ । हाल काठमाडौंको जनसंख्या २० लाख ४१ हजार पाँच सय ८७ पुगेको विभागले जनाएको छ । विभागले सार्वजनिक गरेको तथ्यांकमा सबैभन्दा बढी जनसंख्या वृद्धिदर भक्तपुर र कम जनसंख्या रामेछापमा रहेको पाइएको छ ।

विभागको नयाँ तथ्यांकमा पुरुषभन्दा महिलाको संख्या बढी रहेको छ । सार्वजनिक तथ्यांक अनुसार पुरुषको संख्या एक करोड ४२ लाख ५३ हजार पाँच सय ५१ र महिलाको संख्या एक करोड ४९ लाख ११ हजार २७ रहेको छ ।