जनता समाजवादी पार्टीका नेता रामसहायप्रसाद यादव नेपालको तेस्रो उपराष्ट्रपतिका रुपमा निर्वाचित हुनुभएको छ । आज भएको निर्वाचनमा यादवले एमाले उपाध्यक्ष अष्टलक्ष्मी शाक्य र जनमत पार्टीकी नेता ममता झालाई पछि पार्दै उपराष्ट्रपतिमा निर्वाचित हुनुभएको हो ।

प्रतिनिधिसभा, राष्ट्रिय सभा र प्रदेशसभा गरी, रहेको कुल मतभार ५२ हजार ६२८ मा यादवले संघीय संसदतर्फ १४ हजार ५३६ र प्रदेशसभातर्फ १५ हजार ७९२ मतभार गरि ३० हजार ३२८ मतभार प्राप्त गर्नुभएको हो।

उनका निकटतम् प्रतिस्पर्धी एमाले उम्मेदवार अष्टलक्ष्मी शाक्यले प्रदेशतर्फ ८ हजार ११२ र संघीय संसद्‌तर्फ ८ हजार २१६ गरी कुल १६ हजार ३२८ मत प्राप्त गर्नुभएको छ भने,जनमतबाट उपराष्ट्रपतिका उम्मेदवार ममता झाले प्रदेशतर्फ ७२० र संघतर्फ १ हजार ८१७ गरी २ हजार ५३७ मतभार प्राप्त गर्नुभएको राष्ट्रपति-उपराष्ट्रपति निर्वाचन अधिकृतको कार्यालयले जनाएको छ ।

उपराष्ट्रपतिमा निर्वाचित यादव जसपाका संसदीय दलका नेता र बारा-२ बाट निर्वाचित प्रतिनिधिसभा सदस्यसमेत हुन् ।