२७ साउन २०७९ मा राष्ट्रपति कार्यालय, शितलनिवास अगाडि आत्मदाहको प्रयास गरेकी निहारिका राजपुतको छोराको डीएनए आरोपी शिवराज श्रेष्ठसँग मिलेको छ ।

उच्च अदालत, जनकपुरले ८ भदौमा निहारिकाको छोरा र श्रेष्ठको डीएनए जाँच गर्न दिएको आदेश अनुरुप खुमलटारस्थित राष्ट्रिय विधि विज्ञान प्रयोगशालामा गरिएको परीक्षणमा राजपुतका छोराको डीएनए श्रेष्ठसँग मिलेको उच्च अदालत जनकपुरले जनाएको छ।

राजपुतले पटक-पटक डीएनए परिक्षणको माग गर्दै अनशन बसेपछि भदौ ५ गते तत्कालीन कानूनमन्त्री गोविन्द बन्दीका्े उपस्थितिमा तीन बुँदे सहमति गरेर अनशन तोडेकी थिइन् । यसअघि, श्रेष्ठले निहारिकासँग आफ्नो सम्बन्ध भए पनि बच्चा आफ्नो नभएको दाबी गर्दै आएका थिए ।यता,निहारिकाले भने डीएनए मिलेको अवस्थामा श्रेष्ठलाई बलात्कारको कसूरमा सजाय हुनुपर्ने माग गरेकी थिइन् ।

डीएनए परिक्षणको रिपोर्ट आएपछि श्रेष्ठलाई पक्राउ गर्नुपर्ने भन्दै प्रधानमन्त्री निवास अगाडी पत्रकार सम्मेलन गर्न पुगेकी राजपुतलाई आज प्रहरीले पक्राउ गरेर छाडेको छ। प्रधानमन्त्री निवासजस्तो सुरक्षा संवेदनशील क्षेत्रमा पत्रकार सम्मेलन गर्न लागेकोले उनलाई पक्राउ गरेर केहि समयमा छोडिएको प्रहरीले जनाएको छ।