रुसी राष्ट्रपति भ्लादिमिर पुटिनले युक्रेनलाई ध्वस्त पार्ने रुसी संघको कुनै नियत नभएको बताएका छन् ।

कजाकिस्तानको राजधानी अस्तानामा क्षेत्रीय नेताहरूसँगको शिखर सम्मेलनपछि पत्रकारहरूसँग कुरा गर्दै राष्ट्रपति पुटिनले भने, “आज के भइरहेको छ, त्यसलाई नम्रतापूर्वक भन्नु सुखद छैन।” “तर यो समयमा यदि रुसले आक्रमण सुरु नगरेको भए, युक्रेन आज जुन अवाथामा छ, त्यो अवस्थामा रुस हुने थियो। त्यसैले हामीले सबै कुरा सही तरिकाले सही समयमा गरिरहेका छौं।”

राष्ट्रपति पुटिनले युक्रेनलाई ध्वस्त पार्ने रुसको नियत नभएको तर युक्रेन नाटोमा सामेल भई रुसी महासंघलाई कमजोर पार्न पश्चिमाको पक्षमा खेल्दै आएकोले आक्रमणप्रति पश्चाताप नरहेको बताएका छन्।

युक्रेनले २४ लाख मानिसहरू बसोबास गर्ने क्रिमियामा पानी आपूर्ति कटौती गरेको र क्रिमियामा पानी आपूर्ति सुचारु गर्न प्रतिकार बाहेक रुससँग अरू कुनै विकल्प नभएको पनि उनले बताएका छन्।

किभमा भएको भर्खरैको मिसाइल आक्रमणको सवालमा भने , रुस र क्राइमिया बीचको एक महत्वपूर्ण पुलमा युक्रेनले गराएको विस्फोटको प्रतिक्रिया मात्र भएको र रुसी सेनाले लक्ष्य गरेको युक्रेनको २९ टार्गेट मध्ये २२ वटा नष्ट गरेको र बाँकी सातवटा पनि नष्ट गर्ने उनले बताएका छन्।

तर विश्लेषकहरुले भने,युक्रेनले आफ्नो आक्रमणलाई तिब्र रुपमा अगाडि बढाएको र सो क्षेत्रमा रुसको प्रभाव घट्दै गएको अवस्थामा रुसी सेना पछि हट्दै गएपछि पुटिनको यस्तो प्रतिक्रिया आएको बताएका छन्।