संघिय सरकारले जसपाका मन्त्रिहरु बर्खास्त गरेको विरोधमा मधेश प्रदेश सरकारले मधेश प्रदेशमा रहेका सत्ता गठबन्धनका सबै मन्त्रीहरु हटाउने तयारी गरेको छ।

जसपाले गठबन्धन छाडेर मंसिर ४ गते हुने प्रतिनिधिसभा र प्रदेशसभाको निर्वाचनमा एमालेसँगको समन्वयमा निर्वाचनमा जाने तयारी गरेपछि प्रधानमन्त्री देउवाले आज जसपाका चार जना मन्त्रीहरुलाई बर्खास्त गरेका थिए। संघिय सरकारको कदमको विरोधमा मधेस प्रदेशका मुख्यमन्त्री लालबाबु राउतले प्रदेश सरकारमा रहेका सत्तारुढ गठबन्धनका सबै मन्त्रीहरुलाई बर्खास्त गर्ने तयारी गरेका हुन्।

जसपाबाट मन्त्रि बनेका,संघीय मामिला तथा सामान्य प्रशासनमन्त्री राजेन्द्रप्रसाद श्रेष्ठ, भौतिक पूर्वाधार तथा यातायातमन्त्री मोहम्मद इस्तियाक राई, वन तथा वातावरणमन्त्री प्रदीप यादव र कृषि तथा पशुपन्छी विकासमन्त्री मृगेन्द्रकुमार सिंह यादवलाई आज संघिय सरकारको मन्त्रिपरिषदबाट बर्खास्त गरिएको थियो।

मधेश प्रदेशमा कांग्रेसको तर्फबाट मन्त्रि बनेका भौतिक पूर्वाधार तथा यातायातमन्त्री रामसरोज यादव‚ खानेपानी तथा ऊर्जामन्त्री ओमप्रकाश शर्मा ,महिला बालबालिका तथा खेलकुदमन्त्री वीरेन्द्र सिंह ,मा‌ओ‌वादी केन्द्रको तर्फबाट गृह तथा सञ्चारमन्त्री भरतप्रसाद साह , गृह तथा सञ्चार राज्यमन्त्री रुवी कर्ण र एकीकृत समाजवादीको तर्फबाट उद्योग‚ वन‚ पर्यटन तथा वातावरणमन्त्री शत्रुघन महतो र प्रदेशसभा तथा कानुनमन्त्री प्रमोद यादवलाई बर्खास्त गर्ने तयारी रहेको मुख्यमन्त्रीका प्रेस सल्लाहकारले जानकारी दिएका छन् ।