चितवन क्षेत्र न. ३ का उमेद्वार बिक्रम पाण्डेको उमेद्वारी खारेजिको मागसहित सर्वोच्चमा रिट निवेदन दर्ता भएको छ।

अधिवक्ता अनिल आचार्यले दर्ता गर्नु भएको उक्त रिटमा राप्रपाका नेता पाण्डे लगायत काँग्रेस नेता विजयकुमार गच्छदारसहित ९ जनाको उमेद्वारी खारेजीको माग गरिएको छ।

चितवन–३ का राप्रपा उम्मेदवार विक्रम पाण्डे,सुनसरी–३ का कांग्रेस उम्मेदवार गच्छदार र तनहुँ–१ का स्वतन्त्र उम्मेदवार गोविन्द राज जोशीले भ्रष्टाचार मुद्दा खेपिरहेका , सिन्धुपाल्चोक १ (क) बाट उम्मेदवार रहेका डीबी तामाङ भन्ने युद्धविक्रम तामाङ ज्यान मार्ने उद्योगमा प्रहरीको फरार सूचीमा रहेका,महोत्तरी १ कि उम्मेदवार लक्ष्मी महतो सशस्त्र प्रहरी बलका जवान थमन विकको हत्या आरोपमा मुच्छिएको, रौतहट – ३ का उम्मेदवार प्रभु साह वीरगञ्जका काशी तिवारी हत्यामा जोडिएको,सरिता गिरिले नेपाली भूभाग लिम्पियाधुरा, लिपुलेक र कालापानीबारे विवादित अभिव्यक्ति दिएको र झापा ५ (ख) का उम्मेदवार रेवतराज पुरी सरकारी जग्गा अपचलनको मुद्दा खेपिरहेका कारण उनीहरुको उमेद्वारी खारेज हुनुपर्ने मागसहित आचार्यले सर्वोच्चमा रिट दायर गरेका हुन्।

निर्वाचन ऐन २०७४ को दफा १२ मा रहेको उम्मेदवारको अयोग्यता सम्बन्धी प्रावधानमा रहेको छिद्रका कारण उम्मेदवारी दर्ता गरेको र कानुनले स्वच्छ छवि र उच्च नैतिक चरित्र भएको व्यक्तिलाई उम्मेदवार बनाउने परिकल्पना गरे पनि ऐनको प्रावधानले विभिन्न मुद्दाका आरोपित पनि उम्मेदवार बन्न छुट दिएको भन्दै रिटमा संशोधनको माग समेत गरिएको छ ।

उक्त रिटमा असोज ३० गते सुनुवाइका लागि पेशी तोकिएको छ ।