प्रतिनिधिसभा तथा प्रदेश सभाको आगामी निर्वाचनको सुरक्षार्थ १ लाख १५ हजार म्यादी प्रहरी छनोट गरिएको छ।

२ लाख ३२ हजार ८८ जनाले दरखास्त दिएकामा छनौट भएका १ लाख १५ हजार म्यादी प्रहरीलाई असोज ३० गतेदेखि कात्तिक ८ गतेसम्म निर्वाचन सुरक्षा सम्बन्धी तालिम प्रदान गरिनेछ। ७७ वटै जिल्ला प्रहरी कार्यालयबाट अन्तिम नतिजा प्रकाशन गरि छनोट गरिएका म्यादी प्रहरीको कार्यावधि ४० दिनको रहनेछ। उनीहरुले तलब, भत्ता, रासन र पोसाकबापत एकमुष्ट ५० हजार १ सय ६० रुपैयाँ प्राप्त गर्नेछन्। हिमाली भेगमा खटिने म्यादी प्रहरीलाई भने ज्याकेट किन्न थप १ हजार र यातायात खर्चबापत एक पटकका लागि १ हजार रुपैयाँ उपलब्ध गराइनेछ।

छनौट गरिएका मध्ये सबैभन्दा बढी मधेस प्रदेश र सबैभन्दा कम कर्णाली प्रदेशमा रहेका छन्। जिल्लाको आधारमा सबैभन्दा बढी मोरङमा ३ हजार ६ सय १६ र सबैभन्दा कम मनाङमा २ सय २८ जना छनौट भएका छन्।