अविरल वर्षासँगै आएको पहिरोले हुम्ला चंखेली गाउँपालिका–६ का मानवीर बिकको घर पुरिएको छ। पहिरोमा परि ६० वर्षीया तुलसी विक, १२ वर्षीया हैजा बिक, ९ वर्षीया सुस्मिता विक, ७ वर्षीया बसन्त विकको मृत्यु भएको प्रहरीले जनाएको छ। घाइते भएका अन्य ५ जना व्यक्तिको भने स्वास्थ्य चौकीमा उपचार भइरहेको प्रहरीले जनाएको छ।

त्यसैगरी, मुगुको छायानाथ रारा नगरपालिकाको वडा नम्बर ८ मा पहिरोमा परि एक जनाको मृत्यु भएको छ भने ११ जना बेपत्ता भएका छन् । छायानाथ रारा नगरपालिकामा पहिरोले दर्जनौँ घरमा क्षति पुर्याएको छ भने अन्य दर्जनौं घरहरुपनि जोखिममा रहेका छन्। अविरल वर्षाको कारण बालीनाली पूर्ण रुपमा नष्ट भएको छ भने केहि स्थानमा पुलहरु बगाउँदा यातायात सेवा अवरुद्द हुन पुगेको छ।

त्यस्तै,कालिकोटको तिलागुफा नगरपालिका ४ राँचुलीमा पहिरोमा परि मलामी गएका तिलागुफा नगरपालिका ४ का नवनिर्वाचित वडाअध्यक्ष परमबहादुर शाहीसहित १३ जना बेपत्ता भएका छन्। तिलाकर्णाली नदीमा लाश जलाउँदै गर्दा आएको पहिरोमा पुरिएर उनीहरु बेपत्ता भएको प्रहरीले जनाएको छ।