निर्वाचन आयोगले आगामी प्रतिनिधिसभा र प्रदेशसभा निर्वाचनको लागि उम्मेदवारहरुले गर्न पाउने खर्चको सिमा निर्धारण गरेको छ।

आयोगले निर्वाचन आयोग ऐन, २०७३ को दफा २४ अन्तर्गत रहेर उम्मेदवारहरुको खर्चको सिमा निर्धारण गरेको हो। खर्चको सिमा निर्धारण गर्दा आयोगले,

• २०७९ साल भाद्र ३१ गते कायम भएको मतदाताको आधारमा सम्बन्धित निर्वाचन क्षेत्रमा कायम मतदाताको संख्यालाई साठी प्रतिशत भार,
• मतदान केन्द्रको आधारमा सम्बन्धित निर्वाचन क्षेत्रमा कायम भएको मतदान केन्द्रको संख्यालाई बीस प्रतिशत भार,
• र भौगोलिक क्षेत्रको हकमा सम्बन्धित निर्वाचन क्षेत्रले ओगटेको क्षेत्रफललाई बीस प्रतिशत भारलाई आधार बनाएको छ।

आयोगका अनुसार प्रतिनिधिसभाको निर्वाचनको हकमा ५ वटा निर्वाचन क्षेत्रहरूमा निर्वाचन खर्चको हद २५ लाख रुपैयाँ तोकिएको छ भने १७ वटा निर्वाचन क्षेत्रहरूमा निर्वाचन खर्चको हद २७ लाख रुपैयाँ कायम गरिएको छ। त्यसैगरी, ६५ वटा निर्वाचन क्षेत्रका उम्मेदवारले २९ लाख रुपैयाँसम्म खर्च गर्न पाउने जनाएको छ ।५२ वटा निर्वाचन क्षेत्रहरूमा निर्वाचन खर्चको सिमा ३१ लाख रुपैयाँ कायम गरिएको छ भने २६ वटा निर्वाचन क्षेत्रहरूमा निर्वाचन खर्चको हद ३३ लाख रुपैयाँ कायम गरिएको छ ।

समानुपातिकतर्फका उम्मेदवारहरुको हकमा भने प्रतिनिधिसभा सदस्यको निर्वाचनतर्फ २ लाख र प्रदेशसभाको उम्मेदवारको हकमा १ लाख ५० हजार रुपैयाँको सीमा निर्धारण गरिएको छ।