गठबन्धनका उम्मेदवारलाई भोट नहाल्ने:देशैभर स्वतन्त्र उम्मेद्वारी दिने चेतावनी

काँग्रेसमा समान हक र न्यायका लागि भन्दै आन्दोलित कोइराला पक्षका काँग्रेस नेताहरुले आज पार्टी कार्यालय सानेपामा धर्ना दिएका छन्।

काँग्रेस नेताहरुले ४० प्रतिशत सिट पाउनुपर्ने भन्दै, समानुपातिक निर्वाचन प्रणालीतर्फ उम्मेदवारको बन्द सूची सच्याउन माग गरेका छन्। सभापति देउवाले निकटका मान्छेहरुलाई मात्र टिकट दिएको तर आफ्नो पक्षमा रहेकाहरुलाई भने पाखा लगाउन खोजेको भन्दै,काँग्रेस नेता शेखर कोइरालाले टिकट वितरण न्यायोचित नभएमा पार्टीभित्रै विद्रोह गर्ने र देशभर स्वतन्त्र रुपमा उम्मेदवार खडा गर्ने बताएका छन्।

गठबन्धनको नाममा पार्टीलाई कम्जोर बनाएर मनोमानी ढङ्गले अगाडि बढ्न खोजे चुनाब बहिष्कार गर्ने र गठबन्धनका उम्मेदवारलाई भोट नहाल्ने कोइराला निकट काँग्रेस नेताहरुले बताएका छन्। असन्तुष्ट काँग्रेस नेताहरुले,बालुवाटारमा भागवण्डाको हिसाब मिलाएर मात्र चुनाव जित्न नसकिने भन्दै,प्रत्यक्षको सिट बाँडफाँट र टिकट वितरण न्यायोचित नभए गठबन्धनले चुनाब हार्ने चेतावनी समेत दिएका छन्।