गठबन्धन दलभित्र सिट बांडफांडको विषयलाई लिएर पार्टीभित्रै विद्रोह गर्दै आएको शेखर कोइराला पक्षका काँग्रेसका नेताहरु, पछिल्लो केहि दिन यता प्रतिनिधि सभा र प्रदेश सभाको निर्वाचनका लागि सभापतिले एकलौटी रुपमा उम्मेदवार सिफारिस गरेको भन्दै झनै आक्रोशित बनेका छन् ।

कोइराला निकट काँग्रेस नेताहरुले बालुवाटारमा भागवण्डाको हिसाब मिलाएर मात्र चुनाव जित्न नसकिने भन्दै,प्रत्यक्षको सिट बाँडफाँट र टिकट वितरण न्यायोचित नभए गठबन्धनले चुनाब हार्ने चेतावनी समेत दिएका छन्।

शनिबार खबरदारी सभा गरेका असन्तुष्ट काँग्रेस नेताहरुले,आज पनि पार्टी कार्यालय पुगेर समानुपातिक निर्वाचन प्रणालीतर्फ उम्मेदवारको बन्द सूची सच्याउन माग माग गरेका छन्। सभापति देउवाले निकटका मान्छेहरुलाई मात्र टिकट दिएको तर आफ्नो पक्षमा रहेकाहरुलाई भने पाखा लगाउन खोजेको भन्दै,काँग्रेस नेता शेखर कोइरालाले टिकट वितरण न्यायोचित नभएमा आन्दोलन गर्ने घोषणा गरेका छन्। कोइराला समुहका नेताहरुले ४० प्रतिशत सिट नपाए पार्टी कार्यालयमा धर्ना बसेर आन्दोलनको सुरुवात गर्ने पनि बताएका छन्।
१६ गतेसम्म बन्दसूची नसच्याएमा आफुहरुले कठोर ऐतिहासिक निर्णय लिन बाध्य हुने काँग्रेस नेताहरुले बताएका छन्। गठबन्धनको नाममा पार्टीलाई कम्जोर बनाएर मनोमानी ढङ्गले अगाडि बढ्न खोजे चुनाब बहिष्कार गर्ने र गठबन्धनका उम्मेदवारलाई भोट नहाल्ने कोइराला निकट काँग्रेस नेताहरुले बताएका छन्।

पार्टीलाई नै कम्जोर बनाएर एकलौटी रुपमा अगाडी बढ्न खोजेमा, गठबन्धनका उम्मेदवारले चुनाब जित्न नसक्ने कोइराला पक्षका नेताहरुको निष्कर्ष रहेको छ।