सोमबार मनास्लु हिमालको तेस्रो र चौथो बेस क्याम्पको बीचमा हिमपहिरो गएको छ ।

हिमपहिरो गएपछि अहिले हिमाल आरोहणको क्रममा फसेकाहरुलाई हेलिकप्टरबाट उद्दार कार्य जारी रहेको छ। उद्धारका लागि काठमाडौंबाट हेलिकप्टर उत्तरी गोरखाको अन्तिम गाउँ सामागाउँ पुगेको छ। हिमपहिरोमा फसेकाहरुको उद्दार कार्य जारी रहेपनि आधार शिविरको मौसम सफा नभएकोले घाइतेहरुबारे यकिन विवरण प्राप्त हुन सकेको छैन।

हिमपहिरो गएको क्षेत्रमा रहेका व्यक्तिहरुसंग सम्पर्क हुन नसकेकोले पनि पहिरोमा भएको मानविय क्षतिको बारेमा अहिलेनै केहि भन्न नसकिने पर्यटन विभागले जनाएको छ।निर्मल पुर्जाको इलिट एक्पिडिसनबाट गएका सबै आरोहीहरु भने सुरक्षित रहेको बताइएको छ ।

मनास्लु हिमाल आरोहण गर्न पर्यटन विभागले यस पटक ३८ वटा अरोहण दललाई अनुमति दिएको छ। आरोहण दलमा ९७ महिला र ३ सय ७ पुरुषगरी ४ सय ४ आरोही रहेका छन्।