गठबन्धन दलका शिर्ष नेताहरुले नागरिकता विधेयक र राष्ट्रपतिको कदमबारे कानुनविदहरुसंग छलफल अगाडि बढाइरहँदा राष्ट्रिय जनमोर्चाले भने नागरिकता विधेयक नै खारेज हुनुपर्ने आफुहरुको माग रहेको बताएको छ।

राष्ट्रिय जनमोर्चाका अध्यक्ष चित्रबहादुर केसीले नागरिकता विधेयकका विषयमा राष्ट्रपतिले उठाउनुभएको कदमप्रति भन्दा पनि नागरिकता विधेयक नै खारेज हुनुपर्छ भन्ने कुरामा आफ्नो चासो रहेको बताउनुभएको छ।

केसीले, गठबन्धनमा सामेल भएपनि गठबन्धनका सबै कदम सहि छन् र त्यसलाई मान्नुपर्छ भन्नेकुरा तर्कसंगत नरहेको बताउनुभएको छ। ‘हामीले एमसीसीको विषयमा पनि गठबन्धनको निर्णयमा विरोध गरेका थियौँ र नागरिकता विधेयकको सवालमा पनि हाम्रो फरक मत रहनेछ,यसमा हाम्रो पार्टीको सहमति छैन ,’केसीले भन्नुभयो।

वंशजको आधारमा विदेशीलाई नागरिकता दिने कुरामा राष्ट्रिय जनमोर्चाको समर्थन नरहेको उहाँले बताउनुभएको छ।

यसअघि, प्रधानमन्त्रीको सरकारी निवास बालुवाटारमा बसेको गठबन्धन दलको बैठकमा पनि राष्ट्रिय जनमोर्चा सहभागी नभएको र सत्ता साझेदार दलका चार शीर्ष नेताले हस्ताक्षर गरेको विज्ञप्तिमा पनि हस्ताक्षर नगरेको राष्ट्रिय जनमोर्चाले बताएको छ।