जापानमा अहिलेसम्मकै सबैभन्दा ठूलो आँधी नान्माडोलको कारण सम्बन्धित क्षेत्रका ९० लाख मानिसलाई आफ्नो घर छाडेर सुरक्षित स्थानमा स्थानान्तरण हुन जापान सरकारले आग्रह गरेको छ।

सुपर टाइफुन नानमाडोलमा परी अहिलेसम्म दुई जनाको मृत्यु भएको छ भने करिब ९० जना घाइते भएका छन् ।

आइतवार जापानको सबैभन्दा दक्षिणी टापु, क्युसुमा सुरु भएको आँधी केही दिनमा होन्सुको मुख्य टापु भएर जाने पूर्वानुमान गरिएको छ।

आंधीको कारण दशौं हजार मानिस आपतकालीन आश्रय स्थलमा बसिरहेका छन् भने, आंधी प्रभावित क्षेत्रमा हवाई उडान, रेल सेवा, बिजुली, यातायात लगायतका सम्पूर्ण सेवाहरु अवरुद्ध भएको छ।

कागोशिमा, मियाजाकी, ओइटा, कुमामोटो र यामागुची क्षेत्रका ५००,००० भन्दा बढी मानिसहरूका लागि,जापानको प्रकोप चेतावनी स्केलमा अहिलेसम्मको सबैभन्दा उच्च, पाँच-स्तरको चेतावनी जारी गर्दै, उच्च सतर्कतामा बस्न आग्रह गरिएको छ।